(2) Tlahueliloc capitan Tonatiuh... Iyollotlahueliloc Pedro de Alvarado...

In capitan Pedro de Alvarado quitocayotique Tonatiuh ipampa in coztic teocuitlachimalli quimochimaltitinenca in oquinmacato in iquac yancuican oquinamito in ytitlanhuan Moteuczoma in ilhuica apan inoc imacalco oyetinenca, cayehuatl oquimochimaltitinenca in Pedro de Alvarado in coztic teocuitlachimalli, yeica oquitocayotique Tonatiuh. (Ms¨ 305 f¨ 46 r¨)

(3) Auh cayuh nicmati ca no ompa ohualitztihuallaque in tocolhuan in totahuan Tetzcoca in nican otlalmaceuhque, ihuan in ixquich nohuian cemmanahuac onoc in axcan innecacahualhuan oncate in ye nohuian altepe onoque, ihuan in teochichimeca in ixquich ic yaticac huei colhuacan huei Mollan Xallixco in tonatiuh icalaquiampa onoque chichimecâ tenime popoloca izcenca miec nepapatlatol ic monotza inic nononqua omotlalmacehuique. (Ms¨ 305 f¨ 74 r¨)

(4) in yohual nepantla choloque in Españoles, in amo innemachpan, in amo quimatque in Mexica Tlatilolca, ca amo iuh catca in inyollo in azo quizazque, in azo zan moyohualpolozque in teichtacamictiani, in tepopoyonahualmictiani in Españoles, in Tolteca acalloco miecquintin oatlanmicque.(Ms¨ 305 f¨ 74 v¨)

(5) ca in iquac tzonquiz in necaliliztli, in moman in chimalli, iz ceuh in teoatl tlachinolli inic poliuhque in Tenochca Tlatilolca. Auh ca huel iquac in on calac Tonatiuh, yehuatl izcemiltonalpohualli : ca yehuatl iz ce cohuatl in iquechol Atl oncan tlatoa in Huey Tlalloc moncahuia yaomalinaltetzahuitl. Auh in ipan in itlapohuallo in xiuhtlapohualli ca yei calli in xihuitl (Ms¨ 305 f¨ 4 r¨ + Ms¨ 306 f¨ 2 v¨ + LG¨ p¨ 82, 83-4)

(6) Ye mopilo in Tonatiuh in ocalaque in Teopixque ipan cemilhuitlapohualli matlactli omey cohuatl, in iquechol Tecpatl, ipan in xiuhtlapohualli yei Acatl (Ms¨ 305 f¨ 69 v¨)

(7) Quauhtemotzin ompa omiquito Huei Molan ihuan occenca miequintin Tlatoque Tequihuate, ompa quimpípilo, quím quechmecani in Capitan Hernando Cortes in iquac quinhuicaya in Ompa Huei Molan Xalixco (Ms¨ 305 f¨ 46 v¨)

(8) imomextin in Tlatoque ompa momiquilique in Huei-Molan ompa quimpiloque pochoquauhtitech (Ms¨ 305 f¨ 47 r¨)

(9) Auh yece ca zan moch yuhqui inic maci iz ce xiuhtlapohualli caxtolpohualli ipan epohualli ipan macuilli tonatiuh, ihuan chicuacen horas inic nanauhxiuhtica mochihua bisiexto mochihua quipantilia in xihuitl tecpatl inic amoqualli in xihuitl in onca bisiesto (Ms¨ 305 f¨ 127 v¨)

(10) Auh ca otic hualitotiquizque in ipan in Tonalamatlapohualli iz ceceyaca ic omoteneuhque in itotoca iz cecemilhuitl tlahuica in tonalli, tlayacattitica cecempantitica. Auh niman yehuatl in ic ompantitica in motocayotia iquechol, quitoz nequi, ihuical ixeliuhca : auh inic huel momatiz, inic macicacaquiz, ca in yehuatl in tonaltocaitl in tlayacattitica in acachtopa moteneuhtica, ca oncan pehua in itequiuh in yohualnepantla, in iquac xelihui in yohualli, yhuical in aquin in tlein citlalin acachto moteneuhtica. Auh ic iman iquac tlami in itlatequipanoliz in huel iquac nepantla tonatiuh. Auh ye in iquechol moncahuitihui, mopixtihui, netechmiiyotlapaltilitihui. Auh in iquac oquiz in oquipanahui in nepantla tonatiuh, niman oncan quipehualtia in itequiuh in iquechol oncan conaxilia in zan no yohualnepantla. Auh niman occepa quipehualtia in itequiuh in huel tonalli in oquiz yohualnepantla, zan mochyuhqui (Ms¨ 305 f¨ 130 r¨)

(11) Oncan mítoa in itlapohuallo inquen yancuican ic ocalacquico in Españoles in nican Mexico, ihuan inquenin occeppa yancuican oquipehualtique in yeppa in yeliz in Mexica inic ilhuichihua. (Ms¨ 305 f¨ 86 r¨)

(12) Auh in oquiz in huey Tecuilhuitl, ca niman ye quihualtoquilia in itoca Miccailhuitontli Texochimaco. (Ms¨ 306 f¨ 3 r¨)

(13) Auh ca huel iquac acachto huallaque inic calaquico in Huey Tecpan Mexico in Españoles ca huel oquipantili ce Acatl iz cemilhuitlapohualli, iz cemilhuitonalpohualli iz ce Acatl. Auh zan no huel oquipantili in xiuhtlapohualli zan noyehuatl iz ce Acatl. Oc moztla ipan tlamatlactetiliz inquitocayotia ilhuitl Quecholli. Auh in Ohuallathuic ye iquac in otlamatlactetili in Quecholli ipan Ome Calli iz cemilhuitonalpohualli. Auh in oacic cempohualilhuitl, iquac huel oquipantili in ilhuitl Quecholli. Auh niman ye quihualtoquilia in motocayotia Panquetzalitztli no cempohualilhuitl (Ms¨ 306 f¨ 24 v¨ + LG¨ p¨ 79)

(14) Auh on can in inhualmotlalia nahuilhuitl in motenehua, motocayotia Nenmontemi ¨¨¨ yeica, in yuhqui quitocayotia iz zan nenmontemi acan huel calaqui in ipan in ilhuitl in Tlacempohualtilitiuh in ipan ce xihuitl ilhuitlapohualiztli (Ms¨ 306 f¨ 53 v¨)

(15) Auh ca huel iquac y in ipan in Teccuilhuitontli in quizque in moyohualpoloque, in yohualnepantla choloque in Españoles, in amo in nemachpan, in amo quimatque in Mexica Tlatilolca, ca amo yuh catca in inyollo in azo quizazque, in azo zan moyohualpolozque in teichtacamictiani, in tepopoyonahualmictiani in Españoles in Toltecaacalloco miecquintin oatlanmicque. (Ms¨ 306 f¨ 73 v¨)

(17) Ye mopilo in Tonatiuh in ocalaque in Teopixque ipan cemilhuitlapohualli matlactli omey cohuatl in iquechol Tecpatl (Ms¨ 306 f¨ 57 v¨)

(18) Oncan mitoa in quenin oquinnextilique in Tlenamacaque in Teopixque inin Tonalpohuaya, inin Xiuhtlapohuaya, ihuan iz cecempohualilhuitl inquilhuichihuaya.

Ca inyehuatl in itlatlatollo in quenin huel mocaquiz, in quenin huel mottaz in icacoca in imelauhca itoloca, ca zatepan moch (Ms¨ 306, f¨ 55 r¨) mitoz inic iyollopachihuiz in aquin quimatiznequi in amoxpouhqui inic quittaz inic omotlatlali in ixquich ic omopouhqui in Tlapohualamatl. Ca yehuatl acachto tictlalia in Tonalpohualamatl. Auh niman yehuatl contoquilia in Ilhuitlapohualli, iz cecempohualilhuitl inic ilhuiquixtiaya, quihuihuica tiuh in intotoca. Ca yehuatl in yuhquinma Metztlapohualli, iz cecempohualilhuitl inic ilhuichihuaya, ca amo no quipohuaya in Metztli, ihuan in yancuican inemanaliz, in noce itlacatiliz in Metztli in ihuan in inetehuilacacholiz inic macitica in netlanextil in Metztli iotlatoquiliz, ihuan in icaxahuatiz tlanextil ic tlantiuh in tlanextil. Auh ca zatepan omochquinenehuili, oquitlatlali, oquimachioti in aquin oquicuilo in amoxtlacuillolli inic oquihuihuicalti in matlactli omome metztli iz ce xihuitl oquihuihui iz cecempohualilhuitl inic ilhuiquixtiaya in ye huecauh Tlacahuehuetque, ihuan in totoca. Auh niman yehuatl in Xiuhtlapohualli in tlein in totoca iz cece xihuitl inic ceppa tlami in inetehuilacecholiz in izquixihuitl ic molpitiuh in quitocayotia Toxiuhmolpilia. Ca ye onic hualitotiquiz iz zatepan moch motlatitiaz in inenezca in itolocan, in itenehualoca. Auh ca acachto motlalia in ihuipanaloca iz cecemilhuitl in totoca ca matlactli omey. Auh inic occan huipantiuh ca yehuatl in iquechol in noce imamal mochiuhtihui in huel Tonaltlapohualli, ca no izqui in matlactli omey. Auh niman in tlatzintlan oncan mitoa in itlatlatollo in aquique oncan tlacati, oncan moteneuhtihui iz Cicitlaltin in oncan tlatoa motenehua Planetas. Ah iz cecemilhuitlapohualli motocayotia signos Tonalli, Semana, 1 Cipactli ¨¨¨ xiuhteuctli Tletl.

Capitulo 70. Oncan mitoa in icacoca, in imelauhca itoloca iz cempohualli Semanas in in (Ms¨ 306, f¨ 55 v¨) tonalpohual in ye huecauh huehuetque inic caxíltia iz ce xiuhtlapohualli in ye mochi 365 in tonalpohualli. Ca in iquac omacic inic ceppa tzonquiza iz cempohualli semana (matlactli omey tonatiuh iz cecen Semana), no cuel oc ceppa itechpehua iz ce cipactli, zan ye no cuel yuh. Cen yatiuh in itlapohuallo inyuh otic hualitotiquizque ; zan huel ipan tlami matlacpohualli ihuan yepohualli (260) tonatiuh. Auh in oc iacica mochihua oc macuilpohualli ipan macuilli (105) tonatiuh, inic huel maci ce xihuitl in caxtolpohualli ipan yepohualli ipan macuilli tonatiuh (365) ; ihuan chicuacen horas. Auh ca iquac tzonquiza iz ce xiuhtlapohualli, in iquac itech onaci in quitocayotia Nemontemi in iquac omopouh in Nemontemi, niman ic compehualtia in tlein xihuitl in nahui xihuitl, ca yehuatl in Calli, niman yehuatl in Tochin, niman yehuatl in Acatl, niman yehuatl in Tecpatl, cahuel oncan quipantilitiuh in itech icuiliuhtiuh in tonalpohualli. Oc macuilpohualli ipan macuilli tonatiuh concuitiuh in tonalpohualli in otiquitoque cempohualli semanas matlactli tonatiuh omey. Auh zan nocuelceppa yuh yatiuh in itlapohuallo in yuhqui otiquitoque, inic amo tepolo ; iz zan melahuac ic mopouhtiaz in tonalpohualli ; ca iquac otzonquiz, occeppa zan no itech pehua iz ce Cipactli.

Capitulo 71. In ipehualoca iz cecempohualli tonatiuh inic ilhuiquixtiaya in Huehuetque in tlein totoca ; ihuan mohuihuicaltitiuh in Metztlapohualli ; ipan omonenehuilti iz cecempohualilhuitl, in imilhuiuh catca ye huecauh Tlaca.

Ca iz cequintin Altepehuaque ye ipan quipehualtia in ipan calaqui iz ce xihuitl in Xilomanaliztli, auh in occequintin ye quimpehualtilia in Itzcalli, in noce Xochilhuitl, ihuan in Atemoztli, oncan quintema in quitocayotia zan Nemontemi in macuililhuitl. Auh yece ca zan mochyuhqui inic maci iz cexiuhtlapohualli caxtolpohualli ipan epohualli ipan macuilli tonatiuh ihuan chicuacen horas inic nanauhxiuhtica mochihua bisexto mochipa quipantilia in Xihuitl Tecpatl, in ic amoqualli in xihuitl in onca bisexto.

Enero Xilomaniztli 20

Tlacaxipehualiztli 20-21

Ebrero Tozoztontli 20

Mazo Huey Tozoztli 20

Toxcatl 20-21

Abril Etzalqualiztli 20

Mayo Tecuilhuitontli 20

Junio Miccailhuitontli 20

Julio Huey Miccailhuitl 20

Ochpaniztli 20-21

Agosto Pachtontli 20

Setiembre Huey Pachtli 20

Quecholli 20-21

Octumbre Panquetzalitztli 20

Noviembre Atemoztli 20

Itzcalli Tititl 20-21

Diciembre Xochilhuitl 20*